நீங்கள் தேடியது "நகைகள் பறிமுதல்"

ஆவூர்:

புதுக்கோட்டை மாவட்டம், ஆவூர் அருகே உள்ள சித்தாம்பூர் கிராமத்தை சேர்ந்தவர் பழனியம்மாள் (வயது 45). இவர் கடந்த வாரம் அப்பகுதியில் கீரனூர்-விராலிமலை சாலையோரத்தில் மாடு மேய்த்துக்கொண்டு இருந்தார். அப்போது அந்த வழியாக மோட்டார் சைக்கிளில் வந்த 3 வாலிபர்கள் பழனியம்மாளை தாக்கிவிட்டு அவர் அணிந்திருந்த 2 பவுன் தங்க சங்கிலியை பறித்து சென்றனர். இதைத்தொடர்ந்து அந்த பகுதியை சேர்ந்தவர்கள் வழிப்பறியில் ஈடுபட்டவர்களை பிடிக்க விரட்டிச்சென்றபோது அவர்கள் மின்னல் வேகத்தில் தப்பிச்சென்றனர். அப்போது அவர்கள் பேராம்பூர் வழியாக சென்றபோது அங்குள்ள வேகத்தடையில் மோட்டார் சைக்கிளில் இருந்து கீழே விழுந்து லேசான காயமடைந்தனர்.

இதையடுத்து அப்பகுதியில் இருந்தவர்கள் அவர்கள் பெண்ணிடம் நகை பறித்து சென்றவர்கள் என்று தெரியாமல் அவர்களை தூக்கி விட்டு அனுப்பி வைத்தனர். ஆனால் பின்னர் தான் தெரிந்தது தாங்கள் அனுப்பி வைத்தது பெண்ணிடம் தங்க சங்கிலி பறித்தவர்கள் என்று தெரிந்தது. இதையடுத்து பழனியம்மாள் மண்டையூர் போலீஸ் நிலையத்தில் புகார் கொடுத்தார். அதன் பேரில் மாவட்ட குற்றப்பிரிவு போலீசார் விசாரணை நடத்தி வந்தனர்.

போலீசாரின் தீவிர விசாரனையிவ் இலுப்பூரை அடுத்த மலைக்குடிப்பட்டி சீத்தப்பட்டியை சேர்ந்த மாரிமுத்து மகன் பாண்டியன் (30), அவரது தம்பி கார்த்தி (22) மற்றும் இவர்களது நண்பரான பாசிப்பட்டி கிராமத்தை சேர்ந்த ராஜேந்திரன் மகன் விஜய் என்கிற கருப்பையா (20) ஆகியோர் இந்த வழிப்பறியில் ஈடுபட்டது தெரியவந்தது. இதையடுத்து அவர்கள் தங்களது வீட்டில் பதுங்கியிருந்தபோது அவர்களை போலீசார் பிடித்துச்சென்று விசாரணை நடத்தினர். விசாரணையில், பழனியம்மாளிடம் வழிப்பறி செய்தது மட்டுமின்றி, சித்தாம்பூரை அடுத்த ஆலங்குடியில் ஒரு பெண்ணின் வீட்டுக்கதவை உடைத்து பீரோவில் இருந்த 2½ பவுன், கீரனூர் போலீஸ் நிலைய எல்லைக்குட்பட்ட ஒடுக்கூரில் ஒரு பெண்ணிடம் 3 பவுன் தங்க சங்கிலி, கீரனூரில் ஒரு ஆசிரியரை மிரட்டி 15 பவுன் சங்கிலி, மோதிரத்தை பறித்தது, உடையாளிப்பட்டி போலீஸ் நிலைய பகுதியில் ஒரு நபரை மிரட்டி 7 பவுன் தங்க சங்கிலியை பறித்தது, ஆசிரியையிடம் 4 பவுன் சங்கிலியை பறித்துச்சென்றதை அவர்கள் ஒப்புக்கொண்டனர். இதையடுத்து அவர்களிடம் இருந்து மொத்தம் 33 பவுன் நகைகளை போலீசார் பறிமுதல் செய்தனர்.

மேலும் இதுகுறித்து மண்டையூர், கீரனூர், உடையாளிப்பட்டி ஆகிய போலீஸ் நிலையங்களில் உள்ள புகார்களின் அடிப்படையில் வழக்குப்பதிவு செய்து தொடர் வழிப்பறியில் ஈடுபட்டு வந்த பாண்டியன், கார்த்தி, விஜய் ஆகிய 3 பேரையும் போலீசார் கைது செய்து திருச்சி மத்திய சிறையில் அடைத்தனர். 

தேவதானப்பட்டி:

தேவதானப்பட்டி அருகேயுள்ள நல்லகருப்பன்பட்டியை சேர்ந்தவர் ராதா. எலக்ட்ரீசியன். இவரது மனைவி செல்வி (வயது 36). நேற்று அதிகாலையில் செல்வி வீட்டில் தூங்கி கொண்டிருந்தபோது 2 பேர் மாடிப்படி வழியாக உள்ளே வந்து அவர் கழுத்தில் அணிந்திருந்த 2 பவுன் சங்கிலியை பறித்துக் கொண்டு தப்பி ஓடினர். இதையடுத்து அக்கம்பக்கத்தில் இருந்தவர்கள் அவர்களை விரட்டி சென்றனர். ஆனால் அவர்கள் இருட்டில் ஓடி மறைந்து விட்டனர்.

நல்லகருப்பன்பட்டிக்கு பக்கத்து ஊரான சில்வார்பட்டி மேலத்தெருவை சேர்ந்தவர் முருகன் (40). இவர் குடும்பத்துடன் திருப்பூரில் வேலை பார்த்து வருகிறார். வீட்டில் யாரும் இல்லாததால் வீடு பூட்டிக்கிடந்தது. நேற்று அதிகாலையில் இந்த வீட்டின் பூட்டை மர்ம நபர்கள் உடைத்து பீரோவில் இருந்த 1 பவுன் நகையை திருடி சென்று விட்டனர்.

இதுகுறித்து தேவதானப்பட்டி போலீசார் வழக்குப்பதிவு செய்து மர்ம நபர்களை தேடி வருகிறார்கள். மேலும் இருசம்பவங்களிலும் ஈடுபட்டது ஒரே கும்பல்தானா? என்பது குறித்தும் போலீசார் விசாரித்து வருகிறார்கள்.

நெல்லை:

நெல்லை டவுன் கோடீஸ்வரன் நகரை சேர்ந்தவர் மணிகண்டன் (வயது33). இவர் நெல்லை டவுன் மேல ரதவீதியில் போலீஸ் நிலையம் அருகே ஒரு நகைக்கடை வைத்து நடத்தி வந்தார். இவரது தந்தை லட்சுமணன். ஓய்வு பெற்ற போலீஸ் ஏட்டு ஆவார்.

சம்பவத்தன்று மணிகண்டனும், நகைக்கடை ஊழியர்களும் கடையை பூட்டி விட்டு வீட்டுக்கு சென்று விட்டனர். நள்ளிரவு அங்கு வந்த கொள்ளையன் கதவை உடைத்து உள்ளே புகுந்தான். அங்கு ஷோகேஸ் கண்ணாடிகளை உடைத்து அதில் இருந்த தங்க செயின், நெக்லஸ், வளையல்கள் உள்பட 2 கிலோ எடையுள்ள தங்க நகைகளை கொள்ளையடித்து சென்று விட்டான்.

கொள்ளை போன தங்க நகைகளின் மதிப்பு சுமார் ரூ.50 லட்சம் இருக்கும் என்று கூறப்படுகிறது. இதுகுறித்து கடை உரிமையாளர் மணிகண்டன் டவுன் குற்றப்பிரிவு போலீசில் புகார் செய்தார்.

சம்பவ இடத்திற்கு நெல்லை மாநகர போலீஸ் கமி‌ஷனர் மகேந்திர குமார் ரத்தோட் உத்தரவின் பேரில் துணை போலீஸ் கமி‌ஷனர் பெரோஸ்கான் அப்துல்லா, உதவி கமி‌ஷனர் எஸ்கால், இன்ஸ்பெக்டர் ஜெயசீலன், சப்-இன்ஸ்பெக்டர்கள் விஜய் கோல்டன்சிங், காசிப்பாண்டி மற்றும் போலீசார் விரைந்து சென்று விசாரணை நடத்தினர்.

ஷோகேசை உடைத்ததில் கொள்ளையனின் கையில் ரத்தக்காயம் ஏற்பட்டது. இதனால் அங்கு கிடந்த கண்ணாடி துண்டுகளில் ரத்தம் சிதறி இருந்தது. அதை போலீசார் சேகரித்து பரிசோதனைக்கு அனுப்பினர்.

கொள்ளையர்களை பிடிக்க 3 தனிப்படை அமைக்கப்பட்டது. தனிப்படை போலீசார் தீவிர விசாரணை நடத்தி வந்தனர். நகைக்கடையில் இருந்த கண்காணிப்பு கேமராவை ஆய்வு செய்தபோது கொள்ளை குறித்த தகவல் கிடைக்கவில்லை.

பின்னர் அந்த கண்காணிப்பு கேமராவில் கொள்ளை சம்பவத்திற்கு முன்பு 10 நாட்களாக பதிவான காட்சிகளை போலீசார் பார்வையிட்டு ஆய்வு செய்தனர். அப்போது மர்ம நபர் ஒருவர் இரவில் நகைக்கடைக்கு வந்து நகைகளை நோட்டம் பார்ப்பது பதிவாகி இருந்தது.

இதையடுத்து போலீசார் அந்த மர்ம நபர் குறித்து விசாரணை நடத்தினர். மேலும் அவரை பற்றிய விபரங்களை சேகரித்தனர். அப்போது அவர் நெல்லையை அடுத்த அருகன்குளத்தை சேர்ந்த கணேசன் (35) என்பது கண்டு பிடிக்கப்பட்டது. கணேசன் மீது ஏற்கனவே தாழையூத்து போலீஸ் நிலையத்தில் திருட்டு வழக்கு உள்ளது.

கொள்ளை சம்பவத்திற்கு பின்னர் தலைமறைவானார். மேலும் ஒரு தனியார் நகைக்கடையில் அவர் நகைகளை அடகு வைத்திருந்தார். மேற்கண்ட விவரங்களை தனிப்படை போலீசார் சேகரித்தனர். இதையடுத்து கணேசனை மடக்கி பிடிக்க திட்டமிட்டிருந்தனர்.

இன்று காலை ஊருக்கு வந்த கணேசனை போலீசார் மடக்கி பிடித்து கைது செய்தனர். அவரிடம் இருந்து 100 பவுன் நகையை போலீசார் பறிமுதல் செய்தார்கள். மற்ற நகைகள் எங்கு உள்ளன? இந்த கொள்ளையில் வேறு யாருக்காவது தொடர்பு உள்ளதா? என்பது குறித்து தொடர்ந்து விசாரணை நடந்து வருகிறது. நகைக்கடையில் கொள்ளையடித்த வாலிபரை தீவிரமாக துப்பு துலக்கி ஒரு வாரத்தில் மடக்கி பிடித்த போலீசாரை உயர் அதிகாரிகள் பாராட்டினர்.

பூந்தமல்லி:

சென்னையில் அரும்பாக்கம், அண்ணாநகர், திருமங்கலம், ஜெ.ஜெ.நகர் உள்ளிட்ட புற நகர் பகுதிகளில் கடந்த சில வாரங்களாக அடிக்கடி தங்கச்சங்கிலி பறிப்பு சம்பவங்கள் நடைபெற்று வந்தன.

இந்த சம்பவத்தில் ஈடுபட்டவர்களை பிடிக்க அண்ணா நகர் போலீஸ் உதவி கமிஷனர் குணசேகரன், அரும்பாக்கம் இன்ஸ்பெக்டர் ரவிக்குமார் ஆகியோர் தலைமையில் தனிப்படைகள் அமைத்து இரவு நேரங்களில் தீவிரமாக ரோந்து பணியில் ஈடுபட்டு வந்தனர்.



மேலும் சம்பவம் நடந்த இடங்களில் வைக்கப்பட்டு இருந்த கண்காணிப்பு கேமராவில் பதிவான காட்சிகளை சோதனை செய்தபோது சம்பவம் நடந்த அனைத்து இடங்களிலும் மொபட்டில் பதிவு எண் இல்லாமல் 2 பேர் வந்து தங்கச்சங்கிலியை பறித்துச் செல்வது போல காட்சிகள் பதிவாகி இருந்தன.

இந்தநிலையில் நேற்றுமுன்தினம் இரவு அரும்பாக்கம், ரசாக் கார்டன் பகுதியில் நடந்து சென்ற திருப்பதி என்பவரிடம் மொபட்டில் வந்த 2 பேர், அவர் அணிந்திருந்த தங்கச்சங்கிலியை பறித்து சென்றனர்.

அவர் திருடன், திருடன் என்று சத்தம் போட்டதையடுத்து அங்கு ரோந்து பணியில் இருந்த போலீசார் அந்த 2 பேரை மடக்கிப் பிடித்தனர். மேலும் சங்கிலி பறிப்பு தொடர்பாக ஏற்கனவே கண்காணிப்பு கேமராவில் பதிவான அதே நபர்கள்தான் இவர்கள் என்பது உறுதியானது.

பிடிபட்டவர்கள் வில்லிவாக்கத்தை சேர்ந்த சபி பாட்ஷா (வயது 27), அண்ணா நகரை சேர்ந்த பிரகாஷ் (29) என்பதும் தெரியவந்தது. இவர்கள் அளித்த வாக்குமூலத்தின்படி பெரம்பூரை சேர்ந்த ராஜ்குமார் (24) என்பவரையும் கைது செய்து விசாரணை மேற்கொண்டனர்.

விசாரணையில், சபி பாட்ஷா, பிரகாஷ் 2 பேரும் மொபட்டில் அமர்ந்து கொண்டு தனியாக நடந்து செல்லும் பெண்களை குறிவைத்து நோட்டமிடுவார்கள். இவர்களுக்கு சற்று தூரத்தில் ராஜ்குமார் காரில் அமர்ந்து கொண்டு அந்த வழியே வேறு யாராவது வருகிறார்களா? என்று பார்த்துக் கொண்டு இருப்பார்.

தங்கச்சங்கிலியை பறித்தவுடன் அதை காரில் இருக்கும் ராஜ்குமாரிடம் கொடுத்து விட்டு சென்று விடுவார்கள். ராஜ்குமார் ஏதும் தெரியாதது போல் நகையுடன் காரை எடுத்து சென்று விடுவார்.

போலீசார் தங்களை பிடிக்காமல் இருக்க மொபட்டில் பதிவு எண் இல்லாமல் புதிய வாகனம் போல் வலம் வந்துள்ளனர். இதையடுத்து அந்த 3 பேரையும் போலீசார் கைது செய்தனர்.

அவர்களிடம் இருந்து 40 பவுன் நகைகள், ஒரு கார், 2 மொபட்டுகளை போலீசார் பறிமுதல் செய்தனர். இவர்கள் சிக்குவதற்கு கண்காணிப்பு கேமராவில் பதிவான காட்சிகள் பெரும் உதவியாக இருந்ததாக போலீசார் தெரிவித்தனர்.

கடந்த சில மாதங்களுக்கு முன்பு சபி பாட்ஷா, பிரகாஷ் ஆகிய 2 பேரும் தங்கச்சங்கிலி பறிப்பு வழக்கில் கைது செய்யப்பட்டு சிறையில் இருந்து வெளியே வந்தவர்கள் என்பது குறிப்பிடத்தக்கது.